മുന്നറിയിപ്പില്ലാതെ തമിഴ്നാട് അടച്ചിട്ട അട്ടപ്പാടി മുള്ളി ചെക്പോസ്റ്റ് തുറക്കണമെന്ന് ഊട്ടി എംഎൽഎ തമിഴ്നാട് മുഖ്യമന്ത്രിക്ക് നിവേദനം നൽകി

അഗളി: അട്ടപ്പാടിയിൽ നിന്ന് ഊട്ടിയിലേക്കുള്ള പാതയിൽ തമിഴ്നാട് വനം വകുപ്പ് അടച്ചിട്ട മുള്ളിയിലെ ചെക്ക്പോസ്റ്റ് തുറക്കണമെന്ന് ആവശ്യപ്പെട്ട് ഊട്ടി എംഎൽഎ ആർ.ഗണേഷ്, തമിഴ്നാട് മുഖ്യമന്ത്രി എം.കെ.സ്റ്റാലിനു നിവേദനം നൽകി. കേരളത്തിൽ നിന്ന് ഒട്ടേറെ സഞ്ചാരികളാണ് അട്ടപ്പാടി, മുള്ളി, മഞ്ജുർ വഴി കിണ്ണക്കരയിലൂടെ ഊട്ടിയിലും എത്തിയിരുന്നത്. നീലഗിരിയിലെ ടൂറിസത്തിന് മുള്ളി ചെക്പോസ്റ്റ്
ഏറെ സഹായകമായിരുന്നു. കൃഷി. വാണിജ്യം എന്നീ ആവശ്യങ്ങൾക്കും ബന്ധുക്കളെ കാണാനും സ്‌ഥിരമായി അട്ടപ്പാടിക്കാർക്ക് ഇതുവഴി യാത്ര ചെയ്യേണ്ടതുണ്ട്. ഈ സാഹചര്യത്തിൽ കേരളത്തിൽ നിന്നുള്ള വാഹനങ്ങൾ പൂർണമായി നിരോധിച്ച നടപടി പുനഃ പരിശോധിക്കണമെന്ന് എംഎൽഎ നിവേദനത്തിൽ ആവശ്യപ്പെട്ടു. എഐഎഡിഎംകെ (ഒപിഎസ് വിഭാഗം) സംസ്ഥാന സെക്രട്ടറി പി.മണികണ്ഠൻ, സംസ്ഥാന പ്രസിഡന്റ് കെ.എൻ.പ്രദീപ് കളരിക്കൽ, യൂത്ത് വിങ് സംസ്ഥാന സെക്രട്ടറി പി.എം. മുസ്തഫ എന്നിവർ എംഎൽഎയോടൊപ്പം ഉണ്ടായിരുന്നു.